కాంతార నటుడు రాకేష్ అకాలమరణం… కన్నడ చిత్ర పరిశ్రమలో విషాదం

బెంగళూరు: కన్నడ సినీ ప్రపంచాన్ని తీవ్ర విషాదంలో ముంచిన వార్త సోమవారం వెలుగులోకి వచ్చింది. దేశవ్యాప్తంగా ప్రేక్షకులను ఆకట్టుకున్న కాంతార: చాప్టర్ 1 సినిమాలో నటించిన రాకేష్ పూజారి(33) హఠాన్మరణం చెందాడు. గుండెపోటు కారణంగా అతడు ప్రాణాలు కోల్పోవటం సినీ వర్గాల్లో విషాదాన్ని నింపింది.

రాకేష్ ఆదివారం రాత్రి ఉడిపిలో జరిగిన ఓ మెహందీ ఫంక్షన్‌కు హాజరయ్యాడు. మిత్రులతో కలిసి సరదాగా గడుపుతూ ఉన్న సమయంలో అకస్మాత్తుగా అతడికి అస్వస్థత వచ్చింది. గుండెపోటు రావడంతో అక్కడికక్కడే కుప్పకూలిపోయాడు. వెంటనే అతడిని సమీప ఆస్పత్రికి తరలించినా అప్పటికే మృతిచెందినట్లు వైద్యులు ధ్రువీకరించారు. కార్డియాక్ అరెస్ట్‌ కారణంగా మృతి చెందినట్లు ప్రాథమికంగా తెలుస్తోంది.

ఈ ఘటనపై కర్కాలా టౌన్ పోలీసులు అసహజ మృతి కేసు నమోదు చేసి దర్యాప్తు ప్రారంభించారు. రాకేష్‌ అకాలమరణంతో కన్నడ చిత్ర పరిశ్రమలో విషాదచాయలు అలముకున్నాయి. పలువురు సినీ ప్రముఖులు తీవ్ర శోకాన్ని వ్యక్తం చేస్తున్నారు. ఇడియట్ సినిమాతో గుర్తింపు పొందిన నటి రక్షిత రాకేష్ మరణంపై ఎమోషనల్ పోస్టు చేశారు. సోమవారం సాయంత్రం రాకేష్ ఇంటికి వెళ్లి ఆయన భౌతిక దేహానికి నివాళులు అర్పించారు.