థానే: మహారాష్ట్రలోని థానే జిల్లాలో మంగళవారం తెల్లవారుజామున విషాదకర ఘటన చోటుచేసుకుంది. ముంబ్రా ప్రాంతంలోని దౌలత్ నగర్‌లోని లక్కీ కాంపౌండ్‌లో ఓ భవనంలోని ఒక భాగం కూలిపోవడంతో వృద్ధురాలు ప్రాణాలు కోల్పోగా, ఆమె కోడలు తీవ్రంగా గాయపడింది.
అకస్మాత్తుగా కూలిన పారాపెట్
అధికారుల సమాచారం ప్రకారం.. మంగళవారం తెల్లవారుజామున 12.36 గంటలకు నాలుగు అంతస్తుల భవనంలోని ఒక ఫ్లాట్ పారాపెట్ ఒక్కసారిగా కూలిపోయింది. ఆ సమయంలో రోడ్డు పక్కన నడుస్తున్న ఇద్దరు మహిళలపై అది పడింది. దీంతో వారిలో ఒకరైన నహిద్ జైనుద్దీన్ జమాలీ (62) అక్కడికక్కడే మరణించగా, ఆమె కోడలు ఇల్మా జెహ్రా జమాలీ (26) తీవ్రంగా గాయపడ్డారు. గాయపడిన ఆమెను ఆసుపత్రికి తరలించగా చికిత్స పొందుతోంది.
ఈ ఘటనపై సమాచారం అందుకున్న థానే మున్సిపల్ కార్పొరేషన్ విపత్తు నిర్వహణ సెల్ చీఫ్ యాసిన్ తడ్వి సంఘటనా స్థలానికి చేరుకుని పరిశీలించారు. అనంతరం మాట్లాడుతూ.. ఆ భవనాన్ని పౌరసంఘం ఇప్పటికే ‘C2B’ కేటగిరీలో ప్రమాదకర భవనంగా గుర్తించినట్లు తెలిపారు. భద్రతా కారణాల దృష్ట్యా భవనంలోని అన్ని ఇళ్లను ఖాళీ చేయించారని, ప్రాంగణానికి సీలు వేశారని వివరించారు. నివాసితులు తమ బంధువుల ఇళ్లలో తాత్కాలిక వసతులు చేసుకున్నట్లు ఆయన వెల్లడించారు.
