అమరావతి ( జర్నలిస్ట్ ఫైల్ ) : రాష్ట్రంలో ఎన్డీయే కూటమి ప్రభుత్వం ఏర్పడి విజయవంతంగా ఏడాది పూర్తి చేసుకున్న సందర్భంగా, వైద్య ఆరోగ్య శాఖా మంత్రి డాక్టర్ సత్యకుమార్ యాదవ్ సమీక్షా సమావేశం నిర్వహించారు. వెలగపూడిలోని ఏపీ సచివాలయంలో జరిగిన ఈ సమావేశంలో శాఖ ఉన్నతాధికారులు, సిబ్బంది పాల్గొన్నారు.
రాష్ట్రంలో అమలవుతున్న ఆరోగ్య, సంక్షేమ పథకాల పురోగతిని మంత్రి సమీక్షించారు. ప్రజల కోసం చేపట్టిన కార్యక్రమాలపై సమగ్రంగా చర్చించారు. అధికారుల పనితీరును విశ్లేషిస్తూ, లోపాలను గుర్తించి వెంటనే సరిచేసుకోవాలని సూచించారు.
లక్ష్యంతో పనిచేయాలి - మంత్రి స్పష్టీకరణ
శాఖ పనితీరులో స్పష్టమైన లక్ష్యాలను నిర్దేశించుకోవాలని, ప్రతి ఉద్యోగి సమర్థవంతంగా విధులు నిర్వర్తించాలని మంత్రి తెలిపారు. బాధ్యతాయుతంగా వ్యవహరించాలన్నది ఆయన స్పష్టమైన సందేశం. ప్రజలకు మెరుగైన వైద్య సేవలు అందించేందుకు ప్రతి ఒక్కరూ కట్టుబడి ఉండాలని సూచించారు.
సాంకేతికత, కొత్త ఆలోచనలపై దృష్టి
తాజా సాంకేతిక పరిజ్ఞానం వినియోగాన్ని విస్తృతం చేయాలని, నూతన ఆవిష్కరణలు, విధానాలకు ప్రాధాన్యత ఇవ్వాలని మంత్రి అధికారులను ఆదేశించారు. ప్రజల అవసరాలకు అనుగుణంగా సేవలలో మెరుగుదల తీసుకురావడమే లక్ష్యంగా శాఖ ముందుకు సాగాలని అన్నారు.
