విభిన్న కథలతో తనకంటూ ప్రత్యేక గుర్తింపు తెచ్చుకున్న యువ కథానాయకుడు సుహాస్ ప్రధాన పాత్రలో నటించిన తాజా చిత్రం ‘ఓ భామ అయ్యో రామ’. రొమాంటిక్ కామెడీ ఎంటర్‌టైనర్‌గా రూపొందిన ఈ సినిమాకు రామ్‌ గోధల దర్శకత్వం వహించగా, హరీష్ నల్ల వీ ఆర్ట్స్ పతాకంపై ఈ చిత్రాన్ని నిర్మించారు. జూలై 11న ప్రపంచవ్యాప్తంగా ఈ సినిమాను విడుదల చేయనున్నారు.
ట్రైలర్ విడుదల – ఆకట్టుకుంటున్న కంటెంట్
శనివారం ఈ చిత్రం ట్రైలర్‌ను మేకర్స్‌ విడుదల చేశారు. ట్రైలర్‌ను గమనిస్తే కామెడీ, ఎమోషన్‌, ప్రేమకథ అనే అంశాల సమ్మేళనంగా ఈ సినిమా అన్ని వర్గాల ప్రేక్షకులను ఆకట్టుకునేలా రూపొందినట్లు స్పష్టమవుతోంది. ట్రైలర్ విడుదలైన కొద్ది సేపటికే మంచి స్పందన లభిస్తోంది.
మాళవిక మనోజ్‌కు తెలుగు డెబ్యూట్
ఈ చిత్రంలో మలయాళ చిత్రమైన ‘జో’ ఫేమ్ మాళవిక మనోజ్‌ హీరోయిన్‌గా తెలుగు ప్రేక్షకులకు పరిచయం కాబోతోంది. సుహాస్‌తో ఆమె జోడిగా కనిపించనుండగా, ఇద్దరి మధ్య కనిపించే లవ్ ట్రాక్ ట్రైలర్‌లోనే ఆకర్షణీయంగా ఉంది.
నిర్మాత, దర్శకుడు మాటల్లో…
ఈ సందర్భంగా నిర్మాత హరీష్ నల్ల మాట్లాడుతూ,
“ట్రైలర్‌కి వచ్చిన స్పందన చాలా హార్టెన్‌గా ఉంది. క్యూట్ రొమాంటిక్ ఎంటర్‌టైనర్‌గా రూపొందుతున్న ఈ సినిమా సుహాస్ కెరీర్‌లోనే అత్యధిక బడ్జెట్‌తో తెరకెక్కుతోంది. ప్రతి సన్నివేశం ప్రేక్షకులను కట్టిపడేస్తుంది. జూలై 11న విడుదలకు సిద్దమవుతున్న ఈ సినిమా తప్పకుండా ఓ మంచి అనుభూతిని అందిస్తుంది” అని తెలిపారు.
దర్శకుడు రామ్‌ గోధల మాట్లాడుతూ,
“ప్రతి ప్రమోషన్ కంటెంట్‌కి ఇప్పటివరకు మంచి రెస్పాన్స్‌ వచ్చింది. హరీష్ గారు ఎక్కడా రాజీపడకుండా, పూర్తి నాణ్యతతో ఈ చిత్రాన్ని నిర్మించారు. మణికందన్ సినిమాటోగ్రఫీ ఈ సినిమాకి కలర్‌ఫుల్‌ లుక్ ఇచ్చింది. రథన్ సంగీతం సినిమాలో కీలకంగా నిలవనుంది. ఇందులోని ఆరు పాటలు వేటికవే ప్రత్యేకంగా ఉంటాయి” అని పేర్కొన్నారు.
ప్రత్యేక ఆకర్షణలు
ఈ చిత్రంలో ప్రముఖ దర్శకుడు హరీష్ శంకర్ ఒక అతిథి పాత్రలో కనిపించనున్నారు.
ఈ సినిమాను రొమాన్స్‌, కామెడీ, ఫీల్‌గుడ్ ఎలిమెంట్స్‌తో ఫుల్ ఎంటర్‌టైనింగ్‌గా రూపొందించినట్లు చిత్ర బృందం చెబుతోంది. జూలై 11న థియేటర్లలో ఈ చిత్రం ప్రేక్షకుల ముందుకు రానుంది.
